The Yellow-Haired Laddie

The yellow hair'd laddie sat down on yon brae,
Cried, Milk the yowes, lassie, let nane o' them gae;
And aye as she milkit, she merrily sang,
The yellow hair'd laddie shall be my gudeman.
And aye as she milkit, she merrily sang,
The yellow hair'd laddie shall be my gudeman.

The weather is cauld, and my cleadin is thin,
The yowes are new clipt and they winna bucht in;
They winna bucht in, although I should dee;
O, yellow-hair'd laddie, be kind unto me.
And aye as she milkit, she merrily sang,
The yellow hair'd laddie shall be my gudeman.

The goodwife cries butt the house, Jennie, come ben;
The cheese is to mak, and the butter's to kirn.
Though butter, and cheese, and a' should gang sour,
I'll crack and I'll kiss wi' my love ae half hour.
It's ae lang half hour, and we'll e'en mak it three,
For the yellow-hair'd laddie my gudeman shall be.